مغربی ایشیا میں جاری کشیدگی کے دوران بھارت نے اقوام متحدہ میں آبنائے ہرمز کے ذریعے جہاز رانی کی آزادی کی فوری بحالی پر زور دیا ہے۔ بھارتی مندوب ہریش پروتھنی نے کہا کہ تجارتی جہازوں کو نشانہ بنانا انتہائی قابل مذمت ہے اور اس سے عالمی تجارت اور توانائی کی فراہمی متاثر ہو رہی ہے۔
انہوں نے اپنے بیان میں کہا کہ آبنائے ہرمز بھارت کی توانائی اور اقتصادی سلامتی کے لیے نہایت اہم ہے، اس لیے اس راستے پر محفوظ اور بلا رکاوٹ آمدورفت کو یقینی بنایا جانا ضروری ہے۔ بھارت نے اس بات پر بھی شدید تشویش کا اظہار کیا کہ اس تنازع کے دوران بے گناہ شہری عملہ اور خاص طور پر بھارتی ملاح اپنی جانوں سے ہاتھ دھو بیٹھے۔
بھارتی مندوب نے زور دیا کہ بین الاقوامی قوانین کا مکمل احترام کیا جائے اور تمام ممالک کشیدگی کم کرنے کے لیے سنجیدہ اقدامات کریں۔ انہوں نے کہا کہ بات چیت اور سفارتی کوششوں کے ذریعے مسائل کا حل نکالنا وقت کی اہم ضرورت ہے۔
ادھر عالمی اداروں کے مطابق آبنائے ہرمز، جو عالمی سطح پر تیل اور گیس کی ترسیل کا ایک اہم راستہ ہے، تقریباً بند ہونے کے قریب ہے۔ جہازوں کی آمدورفت میں نمایاں کمی آئی ہے، جس سے عالمی منڈیوں پر منفی اثرات مرتب ہو رہے ہیں۔
اقوام متحدہ کے حکام نے خبردار کیا ہے کہ اگر یہ صورتحال برقرار رہی تو نہ صرف خطے بلکہ دنیا بھر میں معاشی بحران شدت اختیار کر سکتا ہے، جس کا سب سے زیادہ اثر غریب ممالک پر پڑے گا۔
