تلنگانہ کے نگر کرنول ضلع کے ضلعی انتخابی افسر نے وزیراعلیٰ ریونت ریڈی کے دوہری ووٹر اندراج سے متعلق گردش کرنے والی خبروں کو بے بنیاد قرار دیتے ہوئے واضح کیا ہے کہ ان کا نام اچم پیٹ اسمبلی حلقہ یا ضلع کے کسی بھی دوسرے انتخابی حلقے میں ووٹر کے طور پر درج نہیں ہے۔
ضلعی انتخابی افسر کی جانب سے جاری بیان میں کہا گیا کہ 14 جولائی 2026 تک کے ریکارڈ کے مطابق وزیراعلیٰ کا اندراج صرف متعلقہ حلقے میں موجود ہے اور ان کے خلاف دوہری ووٹر رجسٹریشن کا کوئی معاملہ نہیں پایا گیا۔
واضح رہے کہ بعض ذرائع ابلاغ میں یہ دعویٰ کیا گیا تھا کہ وزیراعلیٰ کا نام کوڈنگل اور اچم پیٹ اسمبلی حلقوں کی ووٹر فہرستوں میں ایک ہی شناختی نمبر کے ساتھ موجود ہے۔ بعد ازاں ریاستی حکومت کے حقائق جانچنے والے پلیٹ فارم نے وضاحت کی کہ یہ انتخابی فہرست میں تکنیکی خامی ہے، جسے خصوصی نظرثانی مہم کے دوران درست کیا جا رہا ہے۔
بیان کے مطابق صرف ایک ہی شناختی نمبر کا دو مختلف فہرستوں میں ظاہر ہونا اس بات کا ثبوت نہیں کہ کوئی شخص دو حلقوں میں ووٹ ڈالنے کا اہل ہے۔ وزیراعلیٰ کے اہل خانہ نے بھی انتخابی حکام کو آگاہ کیا ہے کہ ووٹر اندراج کوڈنگل اسمبلی حلقے میں برقرار رکھا جائے، جبکہ دوسرے اندراج کو حذف کرنے کی درخواست دی گئی ہے۔
انتخابی حکام نے واضح کیا کہ تمام ضروری اصلاحات الیکشن کمیشن کے مقررہ ضابطوں کے مطابق مکمل کی جائیں گی۔
