امریکی صدر ڈونلڈ ٹرمپ نے دعویٰ کیا ہے کہ ایران کے ساتھ جاری جنگ ختم ہو چکی ہے اور دونوں ممالک کے درمیان امن معاہدہ آئندہ ہفتے کے آخر تک طے پانے کا امکان ہے۔ ان کا کہنا ہے کہ معاہدے پر دستخط یورپ میں ہو سکتے ہیں اور تقریب میں امریکی نائب صدر بھی شریک ہوں گے۔
صحافیوں سے گفتگو کرتے ہوئے ٹرمپ نے کہا کہ حالیہ مذاکرات میں نمایاں پیش رفت ہوئی ہے اور انہوں نے قطر، متحدہ عرب امارات، سعودی عرب، بحرین، کویت اور پاکستان سمیت کئی ممالک کی قیادت سے بھی رابطے کیے ہیں۔
ٹرمپ کے مطابق ایران نے یہ یقین دہانی کرائی ہے کہ وہ جوہری ہتھیار حاصل کرنے، تیار کرنے یا اس کی کوشش کرنے سے مکمل طور پر دستبردار رہے گا۔ انہوں نے کہا کہ یہی اس پوری مہم کا بنیادی مقصد تھا۔
بعد ازاں ایک عوامی خطاب میں ٹرمپ نے اعلان کیا کہ "ہم نے ایران کے ساتھ جنگ ختم کر دی ہے” اور اب امن کی جانب پیش رفت ہو رہی ہے۔ ان کے مطابق معاہدہ حتمی شکل اختیار کرنے کے بعد آبنائے ہرمز بھی دوبارہ مکمل طور پر کھول دی جائے گی، جس سے عالمی تجارت اور توانائی کی ترسیل میں بہتری آئے گی۔
تاہم ماہرین کا کہنا ہے کہ اگرچہ امریکی صدر کئی بار معاہدے کے قریب ہونے کا دعویٰ کر چکے ہیں، لیکن ابھی تک کسی حتمی سمجھوتے کا باضابطہ اعلان سامنے نہیں آیا۔ اس کے باوجود حالیہ پیش رفت کو مشرقِ وسطیٰ میں امن کی جانب ایک اہم قدم قرار دیا جا رہا ہے۔
