امریکہ اور ایران کے درمیان کشیدگی کے دوران ایک اہم پیش رفت سامنے آئی ہے۔ اطلاعات کے مطابق امریکی حکومت ایران کے منجمد اثاثوں کو خلیجی ممالک میں جنگ سے ہونے والے نقصانات کی تعمیرِ نو کے لیے استعمال کرنے پر غور کررہی ہے۔
رپورٹ کے مطابق امریکی وزارتِ خزانہ نے متعلقہ حکام کو ہدایت دی ہے کہ خلیجی اتحادی ممالک سے انفراسٹرکچر اور دیگر نقصانات کا مکمل تخمینہ حاصل کیا جائے۔ اس کے بعد یہ جائزہ لیا جائے گا کہ آیا ایران کے ضبط شدہ مالی وسائل کو قانونی طور پر تعمیراتی منصوبوں کے لیے استعمال کیا جاسکتا ہے یا نہیں۔
امریکی حکام کا مؤقف ہے کہ خطے میں ہونے والے حملوں اور نقصانات کی مالی ذمہ داری ایران پر عائد ہونی چاہیے۔ دوسری جانب ایران مسلسل مطالبہ کررہا ہے کہ بیرونِ ملک موجود اس کے اربوں ڈالر کے منجمد اثاثے بحال کیے جائیں اور پابندیاں ختم کی جائیں۔
فروری کے آخر سے جاری کشیدگی کے دوران ایران اور امریکہ کے درمیان متعدد فوجی جھڑپیں ہوچکی ہیں۔ حالیہ دنوں میں آبنائے ہرمز کے قریب امریکی کارروائی کے بعد ایران نے کویت اور بحرین میں موجود امریکی فوجی تنصیبات کو میزائلوں سے نشانہ بنانے کا دعویٰ کیا۔ اگرچہ کئی میزائل راستے میں ہی تباہ کردیے گئے، تاہم کشیدگی میں مزید اضافہ دیکھنے میں آیا۔
ادھر امن مذاکرات بھی تعطل کا شکار ہیں۔ ایران کا کہنا ہے کہ کسی بھی ممکنہ معاہدے کے لیے اس کے منجمد مالی وسائل کی واپسی ناگزیر ہے۔ دوسری جانب امریکہ اور اس کے اتحادی ایران پر خطے میں عدم استحکام پھیلانے کا الزام عائد کررہے ہیں۔
