مشرقِ وسطیٰ میں ایک بار پھر کشیدگی بڑھ گئی ہے۔ ایران نے لبنان کے دارالحکومت بیروت پر اسرائیلی حملوں کے بعد اسرائیل پر میزائل حملے کیے، جس کے جواب میں اسرائیل نے ایران کے مختلف علاقوں کو نشانہ بنایا۔
رپورٹس کے مطابق اسرائیلی حملوں کے بعد ایران کے دارالحکومت تہران سمیت کئی شہروں میں دھماکوں کی آوازیں سنی گئیں۔ اسرائیل کا کہنا ہے کہ یہ کارروائیاں لبنان میں حزب اللہ کی جانب سے ہونے والے حملوں کے ردعمل میں کی گئیں۔
ایران نے مؤقف اختیار کیا کہ لبنان میں اسرائیلی کارروائیاں خطے کے امن و استحکام کے لیے خطرہ ہیں اور سفارتی کوششوں کو نقصان پہنچا رہی ہیں۔ بیروت حملوں کے چند گھنٹوں بعد ایران نے اسرائیل کی جانب میزائل داغے، جس سے جنگ بندی کے مستقبل پر سوالات کھڑے ہوگئے۔
دریں اثنا امریکی صدر ڈونلڈ ٹرمپ نے فوری سفارتی رابطے کرتے ہوئے اسرائیلی وزیر اعظم بنیامین نیتن یاہو سے بات چیت کی اور مزید فوجی کارروائی سے گریز کرنے کا مشورہ دیا۔ ٹرمپ نے کہا کہ امریکہ اور ایران کے درمیان ممکنہ معاہدے کے امکانات روشن ہیں اور بڑھتی ہوئی کشیدگی ان کوششوں کو متاثر کرسکتی ہے۔
اس کے باوجود اسرائیلی فوج نے اعلان کیا کہ اس نے ایران کے مغربی اور وسطی علاقوں میں بعض فوجی اہداف کو نشانہ بنایا ہے۔ دوسری جانب عالمی برادری کو خدشہ ہے کہ اگر صورتحال قابو میں نہ آئی تو تنازع پورے خطے کو اپنی لپیٹ میں لے سکتا ہے۔
